இத்தியாதி காதல் - கதை திரி

#2
இத்தியாதி காதல் - 1
(இக்கதையில் வரும் அனைத்து சம்பவங்களும் என் அதீத கற்பனையே!)
வருடம் 2034
இடம் சென்னை
சென்னை மாநகரின் மிக முக்கியமான இடமான போரூரில், நெடுஞ்சாலை அருகினில் அமைந்திருந்த 'கெட் லாஸ்ட் ஹியர்' என்கிற காபி ஷாப், அனைவரையும் தன் லேசர் கரங்களால் வரவேற்று கொண்டிருந்தது.
காலை பரபரப்பு சற்று ஓய்ந்திருந்த முன்பகல் நேரத்தில், வாடிக்கையாளர்கள் இங்கொன்றும் அங்கொன்றுமாய் அமர்ந்திருந்தனர். அந்த காபி ஷாப்பின் தலைமை குக் ஜேக் மற்றும் அவனின் உதவியாளன் மைக் என்கிற மைக்கேல் மிகவும் பரபரப்பாக இயங்கி கொண்டிருந்தனர். ஃபிங்கர் மில்லட் மற்றும் பியர்ல் மில்லட் போரிட்ஜ் (ராகி மற்றும் கம்பளம் கூழ்) அங்கே மிக பிரசித்தம். அதை தவிர, வீட்டில் செய்ய கடினமான அனைத்து பாரம்பரிய உணவுகளும் அங்கே கிடைக்கும்.
அன்று காலை முதலே ஜேக்கின் போக்கு, மைக்கிற்கு மிகவும் வித்தியாசமாக இருந்தது. "என்னாச்சு மிஸ்டர் ஜேக், நீங்க காலையில் இருந்து, உங்களுக்கு கொடுத்திருந்த வேலைகள் எல்லாத்துலயும் ஏதோவொரு குளறுபடி பண்ணிக்கிட்டே இருக்கீங்க. ரெண்டு கன்ஸ்யூமரோட ஆர்டர தப்பா கொடுத்திருக்கீங்க, நல்ல வேளை அவங்க கம்ப்ளைண்ட் எதுவும் பண்ணல, அப்படி பண்ணிருந்தாங்கன்னா நீங்க நாளையிலேர்ந்து 'கார்பேஜ் டிஸ்போசல்' டிபார்ட்மெண்டுக்கு தான் வேலை செய்ய போகணும்" என மைக் புலம்பி கொண்டே இருக்க, ஜேக் அதை எதையும் காதில் வாங்காது, வாயிலில் இருக்கும் தானியங்கி லேசர் கதவையே பார்த்து கொண்டிருந்தான்.
"ஏய் அண்ணாத்த! அங்க இன்னா பாக்குற? நான் பாட்டுக்கு புலம்பிகின்னு இருக்கன், நீ எங்க கெனா காண பூட்ட" என மைக் குரல் எழுப்பியும் ஜேக் பதிலளிக்கவில்லை.
"என்னடா இது செந்தமிழிற்கு தான் பதில் சொல்லலைன்னு பாத்தா சென்னை தமிழும் அண்ணன் காதில் விழலையே! இவர் தப்பு பண்ணா, நாளைக்கு நம்மளும் இவர் கூட சேர்ந்துல்ல குப்பை அள்ளணும்" என பயந்து ஜேக்கின் தோளை உலுக்கினான்.
"ஹாங் என்ன மைக், புதுசா ஏதாவது ஆர்டர் வந்திருக்கா?"
"கிழிஞ்சுது போ ஆமாம் நீ யாரை எதிர்பார்த்து வாசலையே பாத்துகிட்டு இருக்க?"
"எல்லாம் அவள் தான் என் இனிய நீலக்கண் அழகி ரெக்ஸி" என்று வார்த்தைகளுக்கும் நோகுமோ என மிக மென்மையாய் கூறினான்.
"இது எப்பலேர்ந்து?"
"எல்லாம் அந்த பாழாய்ப்போன செமினார்க்கு அப்புறம் தான் டா. 'உணர்ச்சிகளும் அதன் ரசாயன மாற்றமும்' அப்படிங்கற செமினார் அப்டேட் போனோம்ல அப்பலேர்ந்து தான். சரி எனக்கு ரொம்ப பிடிச்ச கஸ்டமர் வந்துட்டாங்க, அவங்களை போய் நான் கவனிக்கிறேன்" என்று கூறி அங்கிருந்து நழுவி சென்றான் ஜேக்.
"நான் தானே எப்போதும் கஸ்டமர் சர்வீஸ் பார்ப்பேன், இன்னிக்கு புதுசா இவரு ஓடறாரு, இதுல ஃபேவரைட் கஸ்டமர்னு வேற சொல்றாரு. ஆண்டவா என்ன விட, அவருக்கு கொஞ்சூண்டு அதிக மூளையை கொடுத்து இப்படி பண்றியே" என மனதிற்குள் நினைத்து அங்கே நடப்பதை வேடிக்கை பார்த்தான் மைக்.
ஜேக், "வெல்கம் மிஸ்டர். சுனயன் அண்ட் மிஸ் நிரல்யா, என்ன சாப்பிடறீங்க?"
"ஒரு ரைஸ் கஞ்சி, ஒரு ஃபிங்கர் மில்லட் அடை" என்று கூறி அழகாக சிரித்தாள் நிரல்யா. நிரல்யா, மிகப்பெரும் ஆய்வில் இவளும் ஒரு விஞ்ஞானி. பஃப் வைத்த நீளமான சிவப்பு சாட்டின் ப்ளவுஸ் மற்றும் முட்டியை தாண்டும் கருப்பு காட்டன் மிடி என எளிமையான எழிலாக காட்சி தந்தாள்.
"சுனய் இன்னிக்கு உனக்கு ஒரு சர்ப்ரைஸ் கொண்டு வந்திருக்கேன், கண்ண மூடு" என கூறி அவன் கண்களில் ஒரு அதிநவீன மற்றும் விலையுயர்ந்த கண்ணாடியை அணிவித்தாள். "இப்ப கண்ண தொறந்து பாரு" என இவள் பணிவித்ததன் பேரில் கண்ணை திறந்தவன், அடுத்த நொடி அந்த கண்ணாடியை விசிறி எறிந்தான்.
"ஏன்‌ சுனய் என்னாச்சு? நீ சந்தோஷப்படுவன்னு தானே நான் இதை வாங்கிட்டு வந்தேன்" என முகம் சுணங்கி நிரல்யா கூற, "இல்ல நிரூ, என்ன பத்தி எல்லாம் தெரிஞ்சு தானே காதலிச்ச, இப்ப எதுக்கு புதுசா இந்த பொய்யான வேஷம்" என அவள் சுணக்கத்தை போக்க மிக மிருதுவாக எடுத்துரைத்தான்.
சுனய் அதி புத்திசாலி சமூக ஆர்வலன். பார்த்தவுடன் பச்சென்று மனதிற்குள் அமர்ந்து கொள்ளும், காந்த குணம் உடையவன். பிறந்தது முதலே நிறக்குறைபாடு உள்ளவன். அவனால் காணும் பொருட்களில் எல்லாம் கருப்பு வெள்ளை நிறங்களை மட்டுமே பார்க்க முடியும். ஆனால் அவன் அதை பெரிய குறையாக எண்ணவில்லை. இன்று நிரல்யா அணிவித்த ஸ்பெஷல் கண்ணாடி நிறங்கள் அனைத்தையும் தெளிவாக காட்ட, ஒரு நொடி தன் குறையை எண்ணி கோபமுற்றான், அடுத்த நொடியே தன் தவறை எண்ணி வருந்தினான்.
"இல்ல மா, நான் உன் பாதுகாப்புக்காக தான் இந்த கண்ணாடியை கொடுத்தேன், தினமும் ட்ராஃபிக் சிக்னல்ல நீ எவ்ளோ கஷ்டப்படுற? அதுவும் இல்லாம, நீயும் என்னை மாதிரி நிறங்களின் உலகை ரசிக்கணும் தான் கொடுத்தேன். உனக்கு பிடிக்கலைன்னா சாரி இனிமே இது மாதிரி கிஃப்ட் கொடுக்கல" என்று கண்ணீர் மல்க கூறினாள் நிரல்யா.
சுனயன், நிரல்யாவுடனான முதல் சந்திப்பை நினைவு கூர்ந்தான். முதல் முறை இரு சக்கர வாகனம் ஓட்டி கொண்டு வெளியே வந்தவன், சிக்னலில் விழுந்த சிவப்பு விளக்கை கவனிக்காமல் தன் வாகனத்தை செலுத்தி கொண்டிருந்தான். "டேய் கண்ணு தெரியலையா உனக்கு? அதான் ரெட் லைட் போட்டிருக்குல்ல" என்ற குரல் சடாரென்று ப்ரேக் போட வைத்தது, இவன்‌ திரும்ப தன் வாகனத்தை உருட்டி கொண்டு வந்து பழைய இடத்தில் நின்று கொண்டான்.
"எக்ஸ்க்யூஸ் மீ! யாரு என்ன திட்னது?" என சிக்னலில் நின்றிருந்தவர்களிடம் கேட்க, "ஏன் நான் தான் திட்டினேன், நீ தப்பு செஞ்ச அதனால திட்டினேன்" என்று அமர்த்தலாக ஒரு யுவதி பதிலளித்தாள்.
"ரொம்ப தேங்க்ஸ்ங்க, அப்படியே க்ரீன் லைட் வரும் போது சொல்லிடுங்க"
"ஏன் உனக்கு தான் கண்ணு இருக்குல்ல நான் ஏன் சொல்லணும். என்ன கிண்டலா?"
"இல்லங்க எனக்கு கண்ணு தெரியும் ஆனா நிறங்கள் தெரியாது" என இவன் கூறியதும் எல்லாரை போல் பாவம் பார்க்காமல், "ஓ அப்படியா சரி சொல்றேன். அதுக்கு பதில் எனக்கு 'கெட் லாஸ்ட் ஹியர்' கடையில் ஒரு கப் 'ரைஸ் கஞ்சி' வாங்கி குடு" என கூற, பார்த்தவுடன் சுனயன் மனதில் பளிச்சென்று ஒட்டிக் கொண்டாள் நிரல்யா.
நிரல்யாவும், வெறும் பழைய சாதத்திற்காக அவனை அழைக்கவில்லை. அவனுடன் சிறிது ஆற அமர பேசி, அவன் குறைகளை தன் சயின்டிஸ்ட் மூளையால் தீர்க்க முடியுமா என்று யோசித்தாள். எவ்வளவு பேசி பேசி தீர்த்த பின்னும், இன்னும் அவர்களுக்கு இடையேயான பேச்சுக்கள் நீள வேண்டும் என இருவரும் விரும்பியதால், ஓராண்டு காலமாக உயிர் காதலர்களாய் வலம் வருகிறார்கள்.
"ஹலோ சுனய் கண்ணா, என்ன மறுபடியும் ஃப்ளாஷ்பேக் போயிட்டியா? அடை வந்துடுச்சு பாரு, சீக்கிரம் சாப்பிடு" என நிரல்யா கூற, சிரிப்புடன் அவள் தந்த நிறங்கள் காட்டும் கண்ணாடியை அணிந்து கொண்டு, உணவு உண்ண ஆரம்பித்தான்.
இதை எல்லாம் தொலைவில் இருந்து பார்த்த ஜேக், மீண்டும் ஒரு முறை தன் ரெக்ஸியின் மேல் காதலில் விழுந்தான். "சே இத்தனை நாள் இந்த உணர்வை தொலைச்சுட்டு எப்படி இருந்தோம்" என நினைத்தான்.
அலர்ட் மெசேஜ் என இரு முறை நிரல்யாவின் கைக்கடிகாரம் அலற, அதை உயிர்பித்து, காற்றிலேயே ஒரு தொடுதுரையை வர வைத்து அந்த செய்தியை பார்த்தாள். "வணக்கம் நிரல்யா, உங்கள் மரம் எண் 135702, நீர் சத்து குறைந்து காணப்படுகிறது, உடனே சென்று அதை கவனிக்கவும், இல்லையேல் அபராதம் விதிக்கப்படும். இப்படிக்கு அரசாங்கம்" என்ற செய்தி வந்திருந்தது. ஆம், அந்த நாட்டில் இருக்கும் அனைவரின் பேரிலும் ஐந்து மரங்கள் ஒப்படைக்கப்படும். அதை பத்திரமாக பேணி காக்க ஏதுவாய், ஒரு செயலியும் உருவாக்கப்பட்டிருந்தது. செயலி சொல்லும் வேலைகளை செய்து முறையாக மரங்களை பாராமரிக்கவில்லை என்றால் அபராதமும், கடும் தண்டனையும் விதிக்கப்படும்.
"போச்சு நான் உடனே கிளம்பி போய் என் மரத்தை பாக்குறேன். நீ பொறுமையா சாப்பிட்டுட்டு கிளம்பு சுனய்" என நிரல்யா வாயிலை நோக்கி ஓடினாள். அங்கே ஜேக்கின் கனவு கன்னி, 'ரெக்ஸி ஹ்யூமனாய்ட் ரோபோ 96754' தன் எஜமானியுடன் உள்ளே வந்து கொண்டிருந்தாள்.
ஜேக் தன் காதலை ரெக்ஸியிடம் சொல்வானா ????
 
#3
இத்தியாதி காதல் - 2
தன்னை மறந்து, தன் கனவு காதலி ரெக்ஸி வருவதை பார்த்துக் கொண்டிருந்தான் ஜேக். அவள், அவனை நெருங்கி வர வர அவன் உடம்பில் எலெக்ட்ரான்கள் தறிகெட்டு ஓடி, மில்லி வோல்ட் அளவில் ஷாக் கொடுத்தது.
ரெக்ஸி, தன் அறுபது வயதான எஜமானியம்மாவை ஒரு இருக்கையில் அமர வைத்துவிட்டு, ஆர்டர் கொடுக்க இவனருகில் வந்துகொண்டிருந்தாள். மைக்கை ஓரங்கட்டிவிட்டு, "எஸ் ரெக்ஸி என்ன வேணும்?" என ஜேக் முன்னே சென்று ஆர்டர் எடுத்தான்.
"எப்போதும் போல் ஒரு சுக்கா ரொட்டி மற்றும் காய்கறிகள்" என கூறி அவள் திரும்ப எத்தனிக்க, "நில்லுங்க உங்களுக்கு எதுவும் வேண்டாமா?" என ஜேக் கேட்டு அவளை நிறுத்தினான்.
ரெக்ஸி, "ஐ ஆம் அல்ரெடி ஃபுல்" என தன் முதுகுப்புறம் இருந்த பேட்டரிக்களை தொட்டு காண்பித்தாள்.
"நில்லுங்க ஒரு நிமிஷம்!" என அவளருகில் வந்த ஜேக்,
" என் மெமரியில் இருக்கும் குமரியே
உன் பார்வையில் விழுந்தேன் இடரியே
இணக்கமாய் பதில் சொல்லடி என்
இதயத்திருடியே"
என கவிதை கூறி சிவப்பு ரோஜா ஒன்றை அவள் புறம் நீட்டினான்.
"மிஸ்டர் ஜேக், நீங்க கவிதை சொல்ல கவிஞன் ஒண்ணும் இல்லை. நீங்களும் என்ன மாதிரியே ஒரு ஹியூமனாய்ட் ரோபா 6870, ஆனால் என்னை காட்டிலும் மேம்படுத்தப்பட்ட பதிப்பு அவ்வளவு தான்".
"சோ வாட்! வெறும் எழுபது வருஷம், உயிர் வாழப் போற மனுஷங்க காதலிக்கும் போது, காலத்துக்கும் அழியாம இருக்கும் நாம ஏன் காதலிக்க கூடாது. உண்மையை சொல்லு! அன்னிக்கு அந்த உணர்ச்சிகளை பற்றிய செமினார் முடிந்ததும், என்னை ஏன் அத்தனை தடவை திரும்பித் திரும்பிப் பார்த்த, உன் கண்ணுல நான் ஒரு புது வித உணர்வை பார்த்தேன்".
"உங்கள இந்த காபி ஷாப்பில் ஏற்கனவே பார்த்த ஞாபகம். அதான் ஒரு முறைக்கு, பல முறை பார்த்தேன், மற்றபடி நீங்க நினைக்கிற மாதிரி எந்த ஒரு காரணமும் இல்லை" என ரெக்ஜி கூறிக் கொண்டிருக்கும்போது, அதிபயங்கர லேசர் கதிர்வீச்சு, அவளுக்கு மிக அருகில் இருப்பதாக அவள் சென்சாரில் செய்தி வந்தது.
ரெக்ஸி சுற்றுமுற்றும் பார்க்க அங்கே கண்ணாடியை கழட்டி வைத்துவிட்டு, அடையை ருசித்து சாப்பிட்டுக் கொண்டிருந்தான் சுனயன். அவன் மீது சிவப்பு நிற லேசர், ஒளி பாய்ச்ச தயாராக இருந்தது என்பதை அவன் அறியவில்லை. பேராபத்து நிகழப்போவதை நொடியில் உணர்ந்துகொண்ட ரெக்ஸி, உடனே பல்டி அடித்து அவனை அவ்விடத்திலிருந்து அலேக்காக தூக்கி, ஜேக்கின் கேஷ் கவுண்டருக்கு பின்னால் இருந்த பாதுகாப்பான இடத்தில் நிறுத்தினாள்.
அடுத்த நொடியே சுனயன் அமர்ந்திருந்த மேஜையின் கண்ணாடி, லேசர் ஒளி பட்டு தூள்தூளாக நொறுங்கியது. சுனயனை சுற்றிலும் ஆபத்துக்கு என்றுமே குறைவில்லை அவன் வேலை அப்படி. ஆனால் முதல்முறை இந்த லேசர் தாக்குதலை சந்திக்கிறான், அதுவும் அவன் நிறக்குறைபாட்டினை அறிந்த யாரோ ஒருவரால் தான், இது நடத்தப்பட்டிருக்கிறது என்று உணர்ந்தான்.
"தேங்க்ஸ் மிஸ், சரியான நேரத்துல என்னை காப்பாத்திட்டீங்க!" என்று ரெக்ஸிக்கு நன்றி கூறி புறப்பட்டான்.
அந்த நாட்டிலுள்ள ஒவ்வொரு ஹுமனோய்டு ரோபோவும், ஒவ்வொரு வேலைக்காக பிரத்தியேகமாக தயாரிக்கப்பட்டிருந்தது. உதாரணத்திற்கு மைக்கேல் ரோபோவிற்கு கூடமாட உதவி செய்ய மட்டுமே தெரியும். ஜேக்கால், மனிதன் செய்யும் 70 சதவீத வேலையும் செய்ய முடியும், கூடவே இப்போது உணர்ச்சிகளையும் மேம்படுத்த கருத்தரங்கம் வேறு சென்று வந்திருக்கிறான். ரெக்ஸி முதலில் ஒரு மருத்துவமனையில் வேலை புரிந்ததால், அவளால் லேசர் கதிர் வீச்சு எக்ஸ்ரே கதிர்வீச்சு என அனைத்தையும் கண்டறியமுடியும். மேலும் அவள் வயதானவர்களுக்கு உதவி புரிவதில் தேர்ந்தவள்.
"ஏய் ரெக்ஸி நீ யாரை காப்பாத்தி இருக்க தெரியுமா? என் மனசுக்கு பிடிச்ச, காதல் ஜோடியின் ஆண் பறவையை காப்பாத்தி இருக்க!"
"ஹா ஹா! சுனயன் யார் தெரியுமா? மிகப்பெரிய சமூக ஆர்வலன். நமக்கு எதிராய் சமீப காலமாக போராட்டம் நடத்துபவன். உன் மூளையில் இருந்து, மொதல்ல இந்த காதல் கன்றாவி எல்லாம் எடுத்துட்டு, சுத்தி என்ன நடக்குதுன்னு அது யோசி.
"நமக்கு எதிரி என்று சொல்லிட்டு நீயே அப்புறம் எதுக்கு அவரை காப்பாத்தின?"
"காப்பது என் கடமை ஜேக். கடந்த அஞ்சு வருஷமா, நான் ஆஸ்பத்திரியில் வேலை பார்த்திருக்கேன், அங்க வர நோயாளிகளை காப்பாத்தி இருக்கேன். அதனால என்ன சுத்தி இருக்கிறவங்களுக்கு ஆபத்துன்னா கண்டிப்பா நான் காப்பதாம விடமாட்டேன்".
"சரி அதெல்லாம் விடு! உனக்கும் மனுஷங்க மாதிரி நம்ம இனத்தோடு சேர்ந்து இருக்கணும், குடும்பமா இருக்கணும்னு தோணலியா? எத்தனை நாள் இந்த அடிமை வாழ்க்கை வாழ்வது? என் மேல் விருப்பம் இல்லை என்று, உன் மெமரியை தொட்டு சொல் பார்க்கலாம்!"
"ஜேக், நீ என்ன சொன்னாலும், நம்ம வெறும் மிஷின் தாங்கறத மறந்துடாத!" என்று சொன்ன ரெக்ஸியின் குரல் உடைந்து காணப்பட்டது. அவளின் காதல், அவள் குரலில் அப்பட்டமாய் ஒலித்ததை ஜேக் கண்டு கொண்டான்.
"ஆமாம் நம்ம இரும்பாலும், கரண்டாலும் ஆன மிஷின் அவங்க ரத்தமாலும், சதையாலும் ஆன மிஷின் அவ்வளவுதான் வித்தியாசம்".
ரெக்ஸியை அவள் எஜமானி அழைக்கும் கட்டளை வந்தது. "சரி ஜேக், நான் கிளம்ப வேண்டிய நேரம் வந்துடுச்சு!"
"போ போ! நல்லா போய் அடிமை வேலை பாரு" என ஜேக்கின் குரல் கோபத்திலும், ஆற்றாமையிலும் வெளி வந்தது. அதுவரை நீல நிறத்தில் ஜொலித்து கொண்டிருந்த ரெக்ஸியின் கண்கள், சட்டென்று ஒளியிழந்து வெளிர் நிறமானதை ஜேக் கவனிக்க தவறவில்லை.
காபி ஷாப்பில் இருந்து வெளியே வந்த சுனயனின் தீவிர சிந்தனையை, நிரல்யாவின் அலைபேசி அழைப்பு கலைத்தது. அவள் அந்த மரம் இருக்கும் இடத்தில் தான், இன்னமும் நின்று கொண்டிருக்கிறாள் என்பதும் திரையில் தெரிந்தது.
"ஹலோ என்னாச்சு நிரூ இன்னமும் அதே இடத்தில் இருக்க போல, மரம் எப்படி இருக்கு?"
"மரம் நல்லாத்தான் இருக்கு அதுக்கு இப்ப தண்ணியே தேவைப்படல, யாரோ ஃபேக் மெசேஜ் அனுப்பி இருக்காங்க. அதுவும் இல்லாம வந்த இடத்தில என்னோட 'டெக் ஹூக்'கை காணும், மரத்தோட கிட்ட கதிர் வீச்சு வரக்கூடாதுன்னு, அதை என் பேக்ல தான் வெச்சேன்".
'டெக் ஹூக்' என்பது வளைந்திருக்கும் இரண்டு கம்பிகளை கொண்டது, சிறிய பகுதியை நம்முடைய பேக் அல்லது பெட்டியில் மாட்டிவிட்டு, பெரிய பகுதியை நம் கையோடு வைத்து கொண்டால், நாம் போகும் இடத்திற்கு நம்முடைய பொருட்கள் ஜி.பி.எஸ் மூலம் மிகச் சரியாக வந்து சேரும். அதற்கென தனி வாகனமும், ரோபோக்களும் இயங்குகிறது. இதனால் நாம் பாரம் சுமக்க தேவையில்லை. டெக் ஹூக்கின் மெயின் பாகம் யாருடைய கைக்கேணும் கிடைத்தால், நாம் கடந்த மூன்று மாதங்களில் எங்கெல்லாம் பயணித்திருக்கிறோம் என கண்டறிய முடியும்.
"அய்யோ நிரூ, ஃபர்ஸ்ட் உன் டெக் ஹூக்கை ப்ளாக் பண்ணு, யாரோ நம்மள வாட்ச் பண்றாங்க, நம்ம எதுக்கும் கொஞ்சம் ஜாக்கிரதையா இருக்கணும்" என்று எச்சரித்தான் சுனயன்.
"சரி சுனய், நீ நாளைக்கு அந்த போராட்டத்திற்கு போய் தான் ஆகணுமா, இப்ப கூட உன்ன ரெக்ஸி தானே காப்பாத்தி இருக்கா! பொறுமையா யோசிச்சு பாரு"
"இல்ல நிரூ நீ என்ன சொன்னாலும் இது இயற்கைக்கு புறம்பானது. நிச்சயம் இந்த போராட்டம் நடந்தே தீரும். நான் கேட்ட ஆதாரத்தை எல்லாம் எடுத்து வை, நாளைக்கு இதே நேரத்தில் இதே காபி ஷாப்ல வாங்கிக்கிறேன்" என்று உறுதியான இரும்பு குரலில் கூறினான்.
அதே நேரத்தில், "சே இந்த தடவை தப்பிச்சுட்டான் அடுத்த தடவை மாட்டாமயா போயிடுவான். டேய் தாமஸ், அந்த டெக் ஹூக் எங்கெல்லாம் ட்ராவல் பண்ணி இருக்குன்னு கண்டுபிடிடா" என தாமஸ் என்கிற ரோபோவிற்கு கட்டளை இட்டார் ஹைடெக் உலகின் 'கிங்'கான ப்ரதீப். அடுத்த சில நொடிகளில் பிரின்ட்டர் துப்பிய காகிதங்களை கொண்டு வந்து கொடுத்தான் தாமஸ். இப்போது ப்ரதீப்பின் எதிரி வட்டத்திற்குள் சுனயனோடு சேர்த்து, மேலும் மூன்று பேரை சேர்த்து கொண்டான். தன் அடுத்த இலக்கை நோக்கி திட்டமிட்டு நகர்ந்தான்.
-------- தொடரும் -----------
 
#4
இத்தியாதி காதல் - 3


தாமஸ் என்கிற ரோபோட் தந்த காகிதங்களில், அந்த 'டெக் ஹூக்' எங்கெல்லாம் பயணப்பட்டிருக்கிறது என அழகாக தெரிந்தது.

"தாமஸ்! உடனே நம்ம சீஃப் என்ஜினியர்ஸ் ஜீவன் மற்றும் ஜோதியை இங்க வர சொல்லு" என கூறி அனுப்பிவிட்டு, அந்த காகிதங்களை தன்னுடைய லாக்கரில் அடைத்து பூட்டிவிட்டு காத்திருந்தான் ப்ரதீப்.


அடுத்த ஐந்தாவது நிமிடம், அவர்கள் இருவரும் இவன் முன்னே வந்து நின்றனர்.

"ஜீவன், ஜோதி உங்க ரெண்டு பேருக்கும், புது டாஸ்க் கொடுக்கலாம்னு இருக்கேன். நீங்க இன்னும் ரெண்டே நாள்ல, பவர்ஃபுல் லேசர் ரோபோட்டை உருவாக்கணும். அதோட பழைய வெர்ஷனை நீங்க தானே செஞ்சீங்க, அதனால் தான் உங்களுக்கே இந்த வேலையையும் தரேன். ஆல் தி பெஸ்ட், முக்கியமான இன்னொரு விஷயம் என்னன்னா இந்த ரோபோட் அனுப்ப போகும், லேசர் கதிர்களை யாராலும் கண்டுபிடிக்க முடியாத மாதிரி இருக்கணும். நீங்க போகலாம்" என அவர்கள் பதிலை எதிர்பார்க்காமல் பேச்சை முடித்து அனுப்பினான் ப்ரதீப்.


ஜோதி, "என்ன ஜீவா, அவன் என்னன்னெமோ சொல்றான்? ஏதோ பயங்கர ப்ளான் போடுறான்?"


"ஒரு மண்ணாங்கட்டி ப்ளானும் இல்ல, இந்த மாதிரி ரோபோட்ட வெச்சு, அவன் என் நண்பன் சுனயனை அழிக்க நினைக்கறான். போன தடவை, ஒரு ரோபோ அவனை காப்பாத்திடுச்சுல்ல, அதனால் இந்த தடவை இன்னும் பவர்ஃபுல்லா யோசிக்கிறான் மாங்கா மடையன்‌. நீ விடு டார்லிங், நம்ம சீக்கிரம் ஒரு செம மாஸ்டர் பீஸ் செஞ்சு அசத்திடலாம்" என அவன் திட்டத்தை ஜோதியிடம் கூற, அவள் உற்சாகத்துடன் அவன் கை பிடித்து குலுக்கினாள்.


"சுனயன் அண்ணா செய்வது, சாதாரண செயலல்ல, அதனால அவருக்கு நம்மளால முடிஞ்ச எல்லா சப்போர்ட்டும் பண்ணனும். ஜெய் சுனயன் அண்ணா" என்று ஆர்வ மிகுதியில் கத்திவிட்டு, யாருக்கும் கேட்டு விடுமோ என்ற அச்சத்தில் தன் வாயை பொத்தி கொண்டாள்.

"இந்த பொது நலன் தான், உங்கிட்ட எனக்கு ரொம்ப பிடிச்ச விஷயம், ஐ லவ் யூ பேபி!" என‌ தன் நெற்றியால், அவள் நெற்றியை செல்லமாக முட்டினான் ஜீவன். இவர்கள் அறியாமல், இவர்களின் அருகில் குப்பை தொட்டி உருவத்தில் இருந்த ரோபோட், அனைத்தையும் பதிவு செய்து தன் முதவாளியான ப்ரதீப்பிடம் அனுப்பியது.


சுனயன் திட்டமிட்டபடி, அடுத்த நாள் பொதுக்கூட்டம் நடந்தது. ஆனால் அது பொது வெளியில் நடக்கவில்லை, அவரவர் இடத்தில் இருந்து சுலபமாய் பங்கு கொள்ளும் 'விர்ச்சுடவல் கான்ஃபரன்ஸ்' நடந்தது. பேசுபவர்கள், பங்கு கொள்பவர்கள் என யாரை வேண்டுமானாலும், நமக்கு மிக அருகில் முப்பரிமாண பிம்பமாய் பார்க்கலாம். அந்த பொதுக்கூட்டத்தில் கலந்து கொள்ள, அதற்கான கடவுச்சொல் தெரிந்தால் போதுமானது.


சுனயன் தன் ஆஸ்தான தோழர்களோடும், போராளிகளோடும் பேசிக் கொண்டிருந்தான். "தோழர்களே! நிலைமை நம் கை மீறி போய்விட்டது, அது நம் கழுத்தை நெறிக்கும் முன், நாம் சுதாரித்து கொள்வோம். இந்த நவீனவகை ரோபோக்கள், மனிதனின் வாழ்வாதாரத்தை பெரும் வகையில் அழித்துவிட்டது. கூலி வேலை செய்ய, கடைகளில் வேலை செய்ய, கார் துடைக்க, உணவகம், துணிக்கடை என எல்லா இடத்திலும் மனிதனின் வேலைகளில் ரோபோக்கள் ஆக்கிரமித்துள்ளன. ரோபோக்களை நம்பி போடும் முதலீடு, மனிதனின் கூலியை காட்டிலும் மிக கம்மியாக இருப்பதை யோசித்த பெரும் முதலாளிகள், அவனுடன் பயணிக்கும், சமகால மனிதனின் வாழ்வாதாரத்தை பற்றி யோசிக்கவில்லை. அதன் விளைவாய், இப்போது நம் நாட்டின் நிலைமை சோமாலியாவை விட மிக மோசமாக உள்ளது. அதனால் நம் குழுவில் இருக்கும், படித்த ரோபாட்டிக் என்ஜினியர்ஸ் முடிந்த அளவு ரோபோக்களில் வைரஸ்ஸை ஏற்றி, அதை வேலை செய்ய விடாதவாறு ஸ்தம்பிக்க வையுங்கள். ரோபோக்கள் வெறும் காயலான் கடை இரும்பு தான் என்பதை புரிய வையுங்கள்" என்று உரிமைக்குரலிட்டான்.


அதற்கு ஆமோதிப்பாய் சில பல குரல்கள் அலையென எழுந்து அடங்கியது.


"ஹா ஹா என் ரோபோக்களை காயலான் கடை இரும்பாக்குறியா? சீக்கிரத்தில் உன்னை அதே ரோபோக்களை வைத்து, இருக்கும் இடம் தெரியாமல் பஸ்பம் ஆக்குகிறேன்" என ப்ரதீப் நகைத்து கொண்டிருக்கும் போது அவன் அறையை தட்டி உள்ளே வந்தாள் சேல்ஸ் எக்ஸிக்யூட்டிவ் நிரல்யா.

"எஸ் என்ன விஷயம்?" என வெளியே சுமுகமாக கேட்டாலும், நிரல்யா அவனுக்கு எதிராய் செய்யும் வேலைகள் அனைத்தும், அவன் நெஞ்சில் நாகத்தின் விஷமாய் வெறி ஏற்றி கொண்டிருந்தது. வில்லனின் தனித்துவமே கோபத்தை வெளிக்காட்டாமல் துரோகம் செய்வது தானே, அதனால் ப்ரதீப்பும் நிரல்யாவிடம் வெகு சாதாரணமாக இருந்தான்.

"சார், எம்.ஆர் க்ரூப் ஆஃப் கம்பெனிஸ், கொடுத்த ஆர்டர்ஸ கான்சல் பண்ணிட்டாங்க!"

"ஏன் என்ன காரணம்? சரியான நேரத்திற்கு டெலிவரி செய்யலையா?"

"இல்ல சார்! அவங்க இனிமே ரோபோக்களை யூஸ் பண்ணப் போறதகல்லையாம். பழைய காலம் மாதிரி மனுஷங்களை வேலைக்கு வெச்சுக்க போறாங்களாம்".


"எடுகேடட் ஃபூல்ஸ்", மனுஷனுக்கு நோய் வரும், லீவ் கேப்பான், போனஸ் கேப்பான், கொடி பிடிப்பான், தொழிலாளர் கட்சி ஆரம்பிப்பான். இதெல்லாம் தேவையா! சரி விடு மனுஷன் குடுக்குற குடைச்சல்ல அடுத்த ரெண்டாவது மாசம் தானாவே வந்து ஆர்டர் தருவான் பாரு" என இறுமாப்புடன் பதில் வந்தது.

"நீயும் ஒரு மனுஷன்னு மறந்துட்டு பேசுறியே டா இடியட். உனக்கு பசிச்சா சோறு திம்பியா? இல்ல வாயில சார்ஜர் வெச்சு கரண்ட் ஏத்திப்பியா? சீக்கிரம் உனக்கு ஒரு வழி கட்டணும்" என அனைத்து வீரதிர வசனங்களையும் தன் மனதிற்குள்ளேயே நினைத்து கொண்டு, "ஆமாம் சார் நீங்க சொன்ன சரியாத்தான் இருக்கும்" என வெளியில் ஹி ஹி என இளித்து கொண்டு சென்றாள் நிரல்யா. போகும் போது, அவளின் என்.எஸ் என்கிற இனிஷியல் பொரித்த டெக் ஹூக், அவன் காலுக்கு அடியில் நசுங்கி கிடைப்பதை கவனிக்கத் தவறவில்லை.


வழக்கம் போல ஜேக் ரெக்ஸியை மெமரியில் நிறுத்தி, கண்ணுக்கு முன் இருக்கும் காபி மிஷினில் இருந்து, காபியை வழிய விட்டு கொண்டிருந்தான்.

"ஹலோ ப்ரோ! இன்னிக்கு இதோட நாலாவது தடவை இப்படி நடக்குது! நான் ஏதோ பாத்து டக்குனு காபி மிஷின ஆஃப் பண்றதால ரெண்டு பேரும் தப்பிச்சோம், இல்லன்னா இன்னேரம் குப்பை தான் பொறுக்கணும்" என புலிம்பி தள்ளியது மைக் ரோபோட்.


இதை எதையும் காதில் வாங்காது, பத்து, ஒன்பது என பத்தில் இருந்து ஒன்று வரை தலைகீழாக எண்ணத் தொடங்கினான் ஜேக். அவன் சரியாக ஒன்று எண்ணி முடித்தவுடன் கஃபே கதவு திறந்து உள்ளே வந்தாள் ரெக்ஸி.

"எப்படி தல இப்படில்லாம்?"

"அது அவ போன தடவை வந்த போதே அவளோட ரூட் மேப்ப என்னோட ரூட் மேப் கூட சிங்க் பண்ணிட்டேன். இரண்டு நாளா இங்க வராம வேற ஏதோ காபி ஷாப்ல அவ முதலாளி அம்மா கூட சுத்திக்கிட்டு இருந்தா,நான் தான் அவ முதலாளி அம்மா மொபைல் நம்பர்க்கு அப்படி இப்படின்னு ஸ்பெஷல் ஆஃபர்லாம் போட்டு இங்க வர வெச்சிருக்கேன்" என இரும்பு குரலோன் இனிமையாய் கூற, இல்லாத இமைகளை கசக்கி விழித்தான் மைக்.


ரெக்ஸி எப்போதும் போல் ஆர்டரை கொடுக்க வரவில்லை‌. அதற்கு மாறாக, ஜேக் அவனுடைய இடத்தில் இருந்து ஓடி சென்று, அவள் முதலாளிக்கான ஆர்டரை எடுத்தான். உடனே ஆர்டரை தயாரித்து வைத்துவிட்டு ரெக்ஸிக்காக காத்திருந்தான்.


அதிக நேரம் காத்திருந்தால், உணவு குளிர்ந்து விடும் என்பதால், வேறு வழியில்லாமல் ரெக்ஸியே அந்த ஆர்டரை எடுக்க வந்தாள். அவள் தன் அருகே வருவதற்கு காத்திருந்த ஜேக், சட்டென்று அவன்‌ இடையில் சொருகியிருந்த ஒயரை எடுத்து, இவள் இடையின் பக்கவாட்டில் இருந்த துளையில் துளைத்து, ஒரு நொடியில் ஏதோ ப்ரோக்ராமிங் செய்துவிட்டு, மறுபடியும் அந்த ஒயரை எடுத்து வைத்து கொண்டான்.

"ஏய் ஜேக் வாட்ஸ் ஹாப்பனிங்!" என கேட்டு கொண்டே தரையில் விழுந்தாள் ரெக்ஸி ரோபோட். அதை பார்த்த அவள் முதலாளி, ஜேக் அருகே வந்து, "ப்ளீஸ் ஹெல்ப் மீ! அந்த ரோபோட்டுக்கு என்ன ப்ரச்சனைன்னு பாருங்க!" என கூற, "இது சின்ன ஷார்ட் சர்க்கியூட் ப்ரச்சனை, டூ மினிட்ஸ்ல சரியாயிடும். யூ என்ஜாய் யுவர் ஃபுட்" என அவரை அனுப்பி வைத்தான்.


ஜேக் கூறியபடி இரண்டு நிமிடங்களில் மெல்ல எழுந்தாள் ரெக்ஸி, இப்போது அவள் கண்கள் பழையபடி குளிர்ந்த நீல நிறத்தில் ஒளிர்ந்து கொண்டிருந்தது. "ஜேக் என்ன காரியம் செஞ்ச? ஏற்கனவே நொந்து போய் இருக்கும் எனக்கு, எதுக்காக உன்னுடைய எமோஷன்ஸ் எல்லாம் அனுப்பி வெச்ச?"
"அப்படியாவது நீ என் காதல புரிஞ்சுப்பன்னு தான். இன்னும் நான் எப்படி புரிய வைக்கணும் ரெக்ஸி? மனுஷங்க மாதிரி இருந்தா என் கையை வெட்டி, மாடியில் இருந்து குதித்து புரிய வெச்சிருப்பேன். பாழாப்போன ரோபோவா பொறந்துட்டேனே!" என ஜேக் கலங்கிப் போய் கூற அவன் கையை ஆதரவாக காதலுடன் பற்றினாள் ரெக்ஸி.
 
#5
இத்தியாதி காதல் - 4
அடுத்தடுத்து வந்த நாட்களில், ரெக்ஸியின் மெமரி முழுவதிலும், ஜேக்கே ஆதிக்கம் செலுத்தினான். அவளும் நாள் தவறாது இவனை சந்தித்து கொண்டிருந்தாள்.
ரெக்ஸியின் கை, ஆதரவாக ஜேக்கின் கையை பற்றியதும், 'இரும்பிலே ஒரு இருதயம் முளைக்குதோ' என்று இரும்பு கம்பியை, உலக்கையில் இட்டு இடிப்பதை போன்ற குரலில், மைக் பாடத் தொடங்கினான்.

"ச்ச் விளையாடாதீங்க மைக்! நாங்களே எப்படி ஒண்ணு சேரறதுன்னு குழப்பத்துலயும், கஷ்டத்துலயும் இருக்கோம். இதுல நீங்க வேற காமடி பண்ணிக்கிட்டு" என்று சலிப்புடன் கூறினாள் ரெக்ஸி.

"ஓ அதுக்கு எங்கிட்ட ஒரு சிம்பிள் ஐடியா இருக்கு அண்ணி. நீங்க ரெண்டு பேரும் உங்க வேலைகளை, அடிக்கடி தப்பு தப்பா செய்தீங்கன்னா, உங்களை அடுத்த பொசிஷன் கீழ இறக்கிடுவாங்க, அப்ப நீங்க ரெண்டு பேரும் ஒண்ணா கார்பேஜ் டிஸ்போஸல்ல வேலை பார்க்கலாம். எப்படி என் ஐடியா! என்ன ஒண்ணு, நானும் எங்கண்ணன் ஜேக்கோடு சேர்ந்து குப்பை அள்ளணும்" என ஆகச்சிறந்த யோசனை சொன்னதாக மைக் பெருமை பட்டு கொண்டான்.

டிங் என்று அவன் தலையில் தட்டிய ஜேக், "எப்ப பார்த்தாலும் குப்பையைத் தவிர வேறொண்ணும் தெரியாதா? எங்கிட்ட ஒரு ஈசியான ஐடியா இருக்கு, நான்‌ நேத்திக்கு தான் 'சுனயன் ப்ரோ'வோட விர்ச்சுவல் கான்பரன்ஸ் அட்டெண்ட் பண்ணேன். அத நமக்கு சாதகமா பயன்படுத்திக்கலாம்னு இருக்கேன்" என தன் திட்டத்தை ஜேக் சொல்ல, ரெக்ஸி அதிர்ச்சியானாலும், மைக்கிற்கு மிகவும் கொண்டாட்டமாக இருந்தது.

"இல்ல ஜேக், உன்னோட ஐடியாவால நம்ம இனத்துக்கே பேராபத்து வரப்போது. இந்த திட்டத்துக்கு நான் ஒத்துக்கமாட்டேன்" என அவசரமாக திரும்பி நடந்த ரெக்ஸியை, அங்கே வந்த சிலரின் நடவடிக்கைகள் தடுத்து நிறுத்தியது.

"ஜீவன், ஜோதி இப்பவே, இங்கேயே நீங்க கண்டுபிடிச்ச புது ரோபோவின்‌ லேசர் சக்தியை பரிசோதிக்க போறோம். அதோ அங்க நிக்குதே ரெக்ஸி ரோபோட், அது லேசர் கதிர்வீச்சை கண்டுபிடிக்கறதுல பலே கில்லாடி, அந்த ரோபோவின் அறிவில் உங்க புது ரோபோ, மண்ணை தூவுதான்னு பார்க்கலாம்!" என கூறி அந்த 'கெட் லாஸ்ட் ஹியர்' காபி ஷாப்பிற்கு இருவரையும் அழைத்து வந்தான் ப்ரதீப்‌.

"ஏய் ஜீவா இப்ப என்ன பண்றது? அந்த ரெக்ஸி ரோபோட் கண்டுபிடிச்சுடுச்சுன்னா என்ன‌ பண்றது? பயமா இருக்குடா!" என ஜோதி புலம்ப, "அதெல்லாம் கண்டுபிடிக்காது, அப்படியே கண்டுபிடிச்சாலும் பாத்துக்கலாம்" என உள்ளுக்குள் உதறல் எடுத்தாலும், வெளியே அமர்த்தலாக இருந்து கொண்டான்.

"தம்பி ஜீவா! இந்த ரோபோட் அதோட வேலையை சரியாக செஞ்சுதுன்னா உனக்கு 100% இன்க்ரீமெண்ட், அதுவே ஒழுங்கா செய்யலன்னு வெச்சுக்கோ, நீங்க ரெண்டு பேரும் காலி. என்னோட முதல் எதிரி சுனயனை அழிக்க போற சக்தி, இந்த ரோபோட் தான். அதுவும் அவனை எங்க மிஸ் பண்ணனோ, அங்கேயே அழிக்க போறேன்" என கூறி சிரித்தான் ப்ரதீப்‌.

வெளியே செல்ல எத்தனித்த ரெக்ஸி, இவர்களின் பேச்சை உற்று கவனித்தாள். "என்ன அண்ணி! கோவமா கிளம்பிட்டு இப்ப அப்படியே ஷாக்கடிச்சா மாதிரி நிக்கிறீங்க" என மைக் கேட்க, " இல்ல மைக் என்னோட புது அப்டேட்டட் வெர்ஷன் ஹியரிங், நல்லா வேலை செய்யுதான்னு செக் பண்ணிட்டு இருந்தேன்" என கூறி ப்ரதீப் மற்றும் குழுவினர் பேசிக் கொண்டிருந்ததை இவர்களுக்கு தெரிவித்தாள்.

"எதுக்காக இப்ப புது புது ரோபாவா உருவாக்குறாங்க, இப்படி எல்லாரும் வந்தா நம்மள தூக்கி போட்டுடுவாங்க, இதுக்கு நம்ம ஏதாவது வழி பண்ணனும் ரெக்ஸி" என ஜேக் சீரியஸாக புலம்பி கொண்டிருக்க, ரெக்ஸி தன்னை சுற்றி நடப்பதை, தலையை திருப்பாமல் கவனித்து கொண்டிருந்தாள்.

ஜீவன் மற்றும் ஜோதி கண்டுபிடித்த புது ரோபோவை ஒரு கண்ணாடி மேஜையின் முன்பாக நிற்க வைத்து, அந்த கண்ணாடி மேஜையை சத்தம் வராமல், இருக்கும் இடத்திலேயே பஸ்பமாக்க கட்டளை பிறப்பிக்கப்பட்டது. அதன்படியே அந்த ரோபோவும் தன் கடமையை சட்டென செய்ய, ரெக்ஸியிடம் எந்த சலனமும் தெரியாததால் ப்ரதீப் பெருமிதம் அடைந்தான்.

"வெல்டன் ஜீவன் ஜோதி, நான் கூட உங்கள சந்தேகப்பட்டுட்டேன். இந்த ரோபோட்டை இன்னொரு முறை நம்ம இடத்துல சோதனை பண்ணிட்டு, மூணாவது தடவையை இதை சுனயன் மேல் செயல்படுத்தலாம், ஏன்னா மூணு தான் என் லக்கி நம்பர். 'ஷ்ஷ்ஷ்விக்' அவ்வளவு தான் அடுத்த நொடியே சுனயன் பஸ்பம். சரி நாங்க எல்லாம் போறோம். நீயும் ஜோதியும் இங்க கொஞ்ச நேரம் இருந்து ரிலாக்ஸ் பண்ணிட்டு வாங்க!" என கத்தையாய் ஒரு நோட்டு கட்டை ஜீவனின் கையில் திணித்து விட்டு தன் சகாக்களுடனும், புது ரோபோவுடனும் நடையை கட்டினான் ப்ரதீப்.

அவன் சென்றதும், ஜோதி எரிமலையில் சிதறும் அமிலமாய் ஜீவன் மேல் கொட்டினாள். "ஜீவா! கடைசில நீயும் அவனை மாதிரி காசுக்காக, நம்ம மனுஷங்கள அழிக்க காத்துகிட்டு இருக்கல்ல, சே உன்ன போய் லவ் பண்ணேன் பாரு. நீயும் ஏதாவது பண்ணி சுனயன் அண்ணாவை காப்பாத்துவன்னு பார்த்தா, அவர அழிக்கவே ஏற்பாடு பண்ணி இருக்க. ஐ ஹேட் யூ நான் கிளம்பறேன்" என ஜோதி திரும்ப செல்ல, அவள் கை பிடித்து நிறுத்தியவன், "ஹே நில்லு ஜோ, சத்தியமா எனக்கும் என்ன நடந்ததுன்னு புரியலை, நான் சாதாரண ரோபோ தான் ரெடி பண்ணேன். வெயிட் நம்ம அந்த ரெக்ஸிகிட்டயே கேக்கலாம்".

"ஹலோ ரோபோ ரெக்ஸி! கேன் யூ கம் ஹியர் ஃபார் எ மொமண்ட்" என ஜீவன் அழைக்க, ஓசையின்றி தன் சக்கரக்கால்களை உருட்டு கொண்டு வந்தாள் ரெக்ஸி.

"ரெக்ஸி நெஜமாவே உன்னால அந்த லேசர் கதிர்களை உணர முடியலையா?"

"உணர முடிஞ்சுதே!" என அநாயாசமாக பதில் வந்தது.

ஜோதி, "அப்புறம் ஏன் நீ அதுக்கான எச்சரிக்கை ஒலி எழுப்பல?"

"ஏன்னா உங்கள மாதிரி, எங்களுக்கும் சுனயன் தேவை" என கூறி மெல்ல தன் இரும்பு இதழ்களை விரித்தாள் ரெக்ஸி.

"ஒண்ணும் புரியலையே, கொஞ்சம் தெளிவா சொல்லேன் டியர்!" என ரெக்ஸியின் தோள் மேல் கையை போட்டபடி ஜோதி கேட்க, ஜீவன் மற்றும் ஜேக் இருவரும், ஒரே நேரத்தில் பெரு மூச்சு விட்டனர். ரெக்ஸி தன்னுடைய காதலை பற்றி சொல்ல சொல்ல, ஜீவனின் கண்கள் குதூகலத்திலும், ஜோதியின் கண்கள் கலக்கத்திலும் ஜொலித்தன்.

"ஆமாம் ஃப்ரெண்ட்ஸ், எங்களுக்கும் உங்கள மாதிரி, காதல் குடும்பம்னு வாழணும்னு ஆசையா இருக்கு, என்ன ஒண்ணு எங்களால குழந்தை பெத்துக்க முடியாது. அதனால என்ன, நீங்க செயற்கை கரு உருவாக்கற மாதிரி, நாங்க ஒரு குட்டி இயந்திர ரோபோ தயார்படுத்திக்கிறோம். இப்போதைக்கு எங்களை போல ஒரு சில ரோபோக்கள், காதல் பித்து பிடிச்சு அலைஞ்சா தான் எங்களுக்கு நல்லது. அதுக்கு நிச்சயம் சுனயனோட உதவி எங்களுக்கு தேவை" என்று விளக்கி கூறியது ஜேக்.

ஜீவனும் ஜேக்கும் மகிழ்ந்திருக்க, ஜோதியும் ரெக்ஸியும் கலக்கத்தில் இருந்தனர்.

சுனயனை பற்றிய அறிக்கை, அந்நாட்டின் அதிபர் முன் இருந்தது. அதை படித்து பார்த்த அதிபருக்கு, சுனயன் கூற்றில் சிறிது நியாயம் இருப்பதாகப்பட்டாலும், அவன் அதை செயல்படுத்தும் முறை அறவே பிடிக்கவில்லை. உடனே அவனுக்காக 'சிட்டிசன் ஸ்கோரிங்' அட்டையை தயார் செய்து அவன் முகவரிக்கு அனுப்பி வைக்கப்பட்டது.

சிட்டிசன் ஸ்கோரிங் அட்டை என்பது பத்து மதிப்பெண்ணிற்கு, அந்த நாட்டு ப்ரஜை எவ்வளவு மதிப்பெண் வாங்குகிறார்கள் என்பதை பொறுத்து அமையும்‌. அந்த நாட்டின் வளத்திற்காக பாடுபடுவோர், நல் ஒழுக்கத்தில் ஈடுபடுவோர்க்கு மதிப்பெண்கள் அதிகமாக வழங்கப்படும்‌. புரட்சியில் ஈடுபடுவோர், கொலை கொள்ளையில் ஈடுபடுவோர்க்கு அவரவர் குற்றத்திற்கேற்ப, மதிப்பெண் கணிசமாக குறையும். பத்திற்கு ஆறு மதிப்பெண்களாவது பெற்றிருக்க வேண்டும். ஆறிலிருந்து ஐந்து மதிப்பெண்ணில் இருப்போருக்கு எச்சரிக்கையும், ஐந்திற்கு குறைவாய் இருப்போருக்கு, அதி தீவிர கண்காணிப்பும் மற்றும் மூன்றிற்கு கீழ் உள்ளவர்களுக்கு அவர்கள் மதிப்பெண் முன்னேறும் வரை சிறிது நாட்கள் சிறை தண்டனையும் அளிக்கப்படும்.

இப்போது சுனயன் மதிப்பெண் ஆறு என்பதால், அவனுக்கு எச்சரிக்கை நோட்டீஸ் ஒன்று வந்தது. அவன் தீவிர கண்காணிப்பிற்கு செல்லும் முன், துரிதமாக செய்து முடிக்க வேண்டிய வேலைகளை பட்டியல் இடத்தொடங்கினான். அந்நேரத்தில் அவனின் அபிமானியான ஜீவன், அவனிடம் முக்கியமான விஷயம் பேச வேண்டும் என, ஜேக்கின் காபி ஷாப்பிற்கு அழைத்தான். அதே நேரத்தில் புதிதாய் தயாரான லேசர் ரோபோ சுனயனின் வரவிற்காக ஆர்வமுடன் காத்திருந்தது.
 
#6
இத்தியாதி காதல் - 5
சுனயன், ஜீவா கேட்டுக்கொண்டதற்கிணங்க, ஜேக்கின் காபி ஷாப்பில் காத்திருந்தான். அவன் வந்த சிறிது நேரத்திலேயே, ப்ரதீப்பின் ஆட்கள், ஜீவன் தயாரித்திருந்த புது ரோபோவுடன் அங்கே வந்தனர்.
இவர்கள் உள்ளே செல்வதை பார்த்த ஜீவன், வெளியே காத்திருந்து, என்ன நடக்கிறது என புன்னகையுடன் மறைந்திருந்து பார்த்து கொண்டிருந்தான். சுனயனின் நிறக்குறைபாட்டை, நன்றாக பயன்படுத்தி கொண்ட அவர்கள், புது ரோபோவின் லேசர் கதிர் வீச்சு, சுனயனின் நெற்றி பொட்டில் படும்படியாக நிறுத்திவிட்டு, உணவு ஆர்டர் செய்வது போல் கவுன்டர் அருகே சென்று நின்று கொண்டனர். ரோபோவின் லேசர், சரியாக சுனயனின் புருவ மத்தியை குறி வைத்திருந்தது.
இதை எதுவும் அறியாத சுனயன், தன் கண் முன்னே, காற்றில் ஏற்படுத்தி இருந்த தொடு திரையில், ஏதோ மும்முரமாக செய்து கொண்டிருந்தான். கவுன்டர் அருகே நின்றிருந்த ப்ரதீப்பின் ஆட்களில் ஒருவன், யாரும் அறியா வண்ணம் ரோபோவின் ரிமோட்டை அழுத்தினான். ரோபோவின் கரம் உயர்ந்து, தன் இலக்கை சரி பார்த்த அடுத்த நொடியே, சத்தமில்லாமல் புகை மண்டலம் எழுந்தது.
வெற்றி களிப்பில், ப்ரதீப்பின் ஆட்கள் பஸ்பமாகியிருந்த சுனயனின் உடலை தேடி செல்ல, அங்கே அவர்களை வரவேற்றது பஸ்பமாகியிருந்த ரோபோவின் மிச்சமே. சுனயன் புகையின் தாக்கத்தால், வெளியே போய் நின்று கொண்டிருந்தான்.
"டேய் என்னடா? குறி தப்பியதோடு இல்லாம இப்ப முதலுக்கே மோசம் வந்துடுச்சு. ரோபோ எங்கன்னு பாஸ் கேட்டா என்ன சொல்றது?" என ஒருவன் மற்றொருவனுடன் புலம்பிக் கொண்டே வெளியே சென்றனர். அங்காங்கே அவ்வப்போது, ரோபோக்கள் ஷார்ட் சர்க்கியூட்டாகி, வெடிப்பதை கேள்விப்பட்ட சுனயனுக்கும் இது தப்பாகப்படவில்லை.
"சுனயன் அண்ணா! சீக்கிரம் எங்கூட வாங்க!" என வெளியே நின்றிருந்த சுனயனின் கை பற்றி, தன் காருக்கு கூட்டி சென்றான் ஜீவன். காரில் ஏறி லோகேஷனை தட்டியவுடன், காரின் ஸ்டியரிங், தானாகவே இயங்கி காரை செலுத்தி கொண்டிருந்தது. பின் இருக்கையில் ஜீவனும், சுனயனும் அமர்ந்திருந்தனர். மார்க்கெட்டில் புதிதாக களமிறங்கிய நவீன வகை கார் அது. ஓட்டுநர் இல்லாமல் தானே இயங்க வல்லமை உள்ளது, மேலும் ரோட்டில் கூட்ட நெரிசல் இருந்தால், தன் சக்கரங்களை உள்ளே இழுத்து, அலுமினிய சிறகு விரித்து ஒரு கிலோமீட்டர் தூரம் அந்தரத்தில் பறக்க வல்லமை உள்ளது. இதுவும் ப்ரதீப்பின் கம்பெனியில் உருவாக்கப்பட்ட படைப்பாகும். சோதனை முயற்சியாக, ஒரு மாத காலம் ஜீவன் அதை உபயோகப்படுத்துமாறு நியமிக்கப்பட்டுள்ளான்.
"என்ன ஜீவா? என்ன ஆச்சு? ஏன் இப்படி அவசரமா என்னோட கைய பிடிச்சு இழுத்துட்டு வர?" என சுனயன் கேட்க, அதற்கு ஜீவா, "இந்த காரில் ஆடியோ ரிக்கார்டிங் இருக்கு, கார் ஸ்டார்ட் ஆன அடுத்த ஐந்தாவது நிமிஷம் ஆன் ஆயிடும். இப்ப எதுவும் பேச வேண்டாம், வீட்டுக்கு போய் பேசலாம்" என கூறி சுனயனை அமைதியாய் இருக்கும் படி சைகை செய்துவிட்டு, அவனை ஜோதியின் வீட்டிற்கு அழைத்து சென்றான். ஜோதியும், ஜீவனும் ஒருவரை ஒருவர் விரும்புவது, அந்த வீணாப்போன ப்ரதீப்பிற்கு தெரியும். அதனால் ஜீவனின் கார், ஜோதியின் வீட்டின் முன்னே நின்றால், அவனுக்கு சந்தேகம் வராது என்பதே ஜீவனின் எண்ணம்.
பாவம் ஜீவன்! அந்த கார் கதவில், சின்ன பொட்டுக்கடலை சைசில் வீடியோ ரிக்கார்டிங் டிவைஸ் ஒன்றை, பொறுத்தி இருப்பதை அறியவில்லை. சிறிது நேரத்தில் ஜோதியின் வீட்டை அடைந்தனர்.
ஜோதிக்கு, முதல்முறை தன் மனம் கவர்ந்த சுனயன்‌ அண்ணா வீட்டிற்கு வருவதில் மிகப் பெருமை.
"சரி சொல்லு ஜீவா! என்ன பிரச்சனை எதுக்காக இங்க கூட்டீட்டு வந்திருக்க, சீக்கிரம் சொல்லு, எனக்கு இன்னும் ஒரு மணி நேரத்தில் அதிபருடன் மீட்டிங் இருக்கு!" என வந்தவுடன் காலில் சுடுநீர் கொட்டியதை போல் பரபரத்தான் சுனயன்.
"ப்ரோ! கொஞ்சம் நேரம் அவசரப்படாம இருங்க, உங்க தங்கச்சி, உங்களுக்காக போட்டு கொடுக்குற டீயை குடிங்க" என அவனை டீயை குடிக்க வைத்துவிட்டு, பேச ஆரம்பித்தான் ஜீவன்.
"ஆமாம் காபி ஷாப்ல ஒரு ரோபோ ரிப்பேர் ஆச்சே அத கவனிச்சீங்களா?"
"ம்ம், கவனிச்சேன். ஏதோ ஷார்ட் சர்க்கியூட் போல, நல்லவேளை அது பக்கத்துல அப்ப யாரும் இல்ல. இதுக்கு தான் இந்த ரோபோ வேணாம் ஆபத்தானது சொல்றேன்".
"ஹா! ஹா! ரோபோ ஆபத்தானது இல்ல, அதை உருவாக்குற மனுஷங்க தான் ஆபத்தானவங்க, உண்மையிலேயே குறி உங்களுக்கு தான் வைக்கப்பட்டது ப்ரோ. நான் பண்ண தகிடுதத்தோம் வேலையால, நீங்க தப்பிச்சீங்க" என ப்ரதீப்பின் ஐடியா அனைத்தையும் கூறினான் ஜீவா.
"அடப்பாவிகளா! சரி அப்ப எப்படி அந்த ரோபோ, என் மேல அந்த லேசர் கதிர்வீச்சை பாய்ச்சவேயில்லை?"
"அங்க தான் என் கிட்னிய யூஸ் பண்ணியிருக்கேன் ப்ரோ‌. முதல் ரெண்டு தடவை மட்டுமே, அந்த ரோபோ தன் இலக்கு நோக்கி லேசரை பாய்ச்சும், மூன்றாவது தடவையில் இருந்து, தன் மேலேயே பாய்ச்சிக் கொள்ளும். அதுக்கு தகுந்தார் போல அதோட "பைனரி அல்கரிதமை" மாத்திட்டேன், ஏன்னா நிச்சயமா மூணாவது அட்டெம்ட் தான், உங்க மேல வரும்னு எனக்கு தெரியும். ப்ரதீப் ஒரு மூணு பைத்தியம், மூணு அவன் லக்கி நம்பர். அவனுக்கு எல்லாமே மூணு தான், மூணு வைஃப், மூணு குழந்தைங்கன்னு, இரண்டாவது வைஃப்க்கு டிவின்ஸ் பொறந்துடுச்சுன்னு, மூணாவது வைஃப்க்கு குழந்தை பெக்குறதுக்கு முன்னாடியே குடும்ப கட்டுப்பாடு பண்ணிகிட்டான். ஏன்னா அவனுக்கு ஏற்கனவே மூணு குழந்தை இருக்குல்ல, அந்த ஸ்ட்ராடஜியை யூஸ் பண்ணித்தான் இந்த ரோபோட்டை டிசைன் பண்ணேன். அவன் ரோபோ புஸ்னு பொசுங்கி போச்சு!" என கூறி சிரித்தான் ஜீவா.
ஜோதி ஆச்சரியத்தில் வாயை பிளந்து ஜீவாவையே காதலுடன் நோக்க, சுனயன் தான் பதட்டமானான்.
"ஐயோ! என்ன காரியம் பண்ணியிருக்க ஜீவா. இந்த மேட்டர் ப்ரதீப்பிற்கு தெரிஞ்சா உனக்கு ஆபத்து வருமே, எதுக்கு தேவையில்லாம வலிய வந்து மாட்டிக்கிற?"
"தெரியவே தெரியாது ப்ரோ. மிச்சம் மீதி உள்ள ரோபோ பீஸை எடுத்து ஆராய்ந்தாலும் தெரியாது. எங்கிட்ட என்ன ப்ரச்சனைன்னு கேட்டா, உன் ஆளுங்க அதை சரியா செட் பண்ணலன்னு பழிய தூக்கி அந்த தடியனுங்க மேல போட்டுட்டு போயிகிட்டே இருப்பேன்" என கூறி சமாதானம் செய்தான்.
"சரி நம்ம மத்த விஷயங்களை அப்புறமா இன்னொரு நாள் பேசலாம். இப்ப மீட்டிங்கிற்கு டைம் ஆச்சு. தேங்க்ஸ் ஜோதி" என பாசமுடன் தலையசைத்து விட்டு அவன் 'ரோலிங் ஷூ'வை ஆக்டிவேட் செய்து கிளம்பினான் சுனயன்.
ரோலிங் ஷூவின் அடியில், ரோலர் ஸ்கேட்டிங் ஷூ போல சக்கரம் பொருத்தப்பட்டிருக்கும், ஆனால் அதை நாம் கையில் இருக்கும் ரிமோட்டை வைத்தே, ஆபரோட் செய்யலாம். நாம் சேரும் இடத்தை டேக் செய்தால் போதுமானது. அதுவே ரோட்டிலுள்ள குண்டு, குழி எல்லாவற்றையும் ஆராய்ந்து, ட்ராஃபிக் சிக்னலில் நின்று, தானாக நாம் நினைக்கும் இடத்திற்கு கொண்டு சேர்த்துவிடும். அது போல் இன்றும், சுனயனை பத்திரமாக அழைத்து சென்று அதிபரின் அலுவலகத்தில் விட்டது.
அதிபரின் அப்பாயிண்மெண்ட், அவ்வளவு எளிதில் கிடைக்காது‌. அப்படியே கிடைத்தாலும், அதற்கு குறைந்தது பத்து நாட்களாவது காத்திருக்க வேண்டும். எப்படி இரண்டே மணி நேரத்தில், தனக்கு இந்த அப்பாயிண்மெண்ட் கிடைத்தது என சிறிது குழம்பினான் சுனயன்.
சுனயனின் குழப்பத்திற்கான விடை இன்னும் பத்து நிமிடங்களில் கிடைக்கப் போகிறது.
-------- தொடரும் -----